Qeveria rikthen rivlerësimin e pronave, një nismë e premtuar që përpara zgjedhjeve parlamentare të 11 majit. Ministria e Financave ka hedhur për konsultim publik projektligjin që mundëson rivlerësimin e pronave me tarifë 5% nga 15% që është aktualisht. Sipas relacionit që shoqëron draftin, ky projektligj synon të krijojë një kuadër ligjor për rivlerësimin e pasurive të paluajtshme të individëve dhe personave juridikë, duke ofruar një instrument për të përshtatur vlerën e pronave të tyre me atë të tregut, në kushtet kur çmimet e pasurive të paluajtshme janë në rritje. Periudha e zbatimit të këtij projektligji propozohet nga data 1 janar 2026 deri më 30 shtator 2026.
Qëllimi i projektligjit është të sigurojë një proces efikas, transparent dhe me kosto të ulët për rivlerësimin e pasurive të paluajtshme, duke përmirësuar saktësinë dhe transparencën e regjistrave të pasurive, si dhe duke nxitur zhvillimin e tregut të pasurive të paluajtshme. Ky rivlerësim është i nevojshëm për shkak dhe të rishikimit të çmimeve mesatare referuese të banesave, të cilat po përafrohen me çmimet reale të tregut.
https://konsultimipublik.gov.al/documents/RENJK_849_Final-Projektligj-Rivleresimi-i-pasurise.docx
https://konsultimipublik.gov.al/documents/RENJK_849_Final-Relacioni-Shoqerues-v1.doc